يا رب إني غريب
علي ناصية الأحداث
عاجز عن التفكير
عاجز عن التعبير
عاجز عن الدهشة
الدنيا بحر غميق
وأنا يا عيني غريق
والشط مش باين
وبنادي ع الأوليا
وبنادي ع الصالحين
مسكين يعين مسكين
يا ست يا عذرا
قولي لسيدنا الخضر
يجي يدل غريب
تايه عن الحكمة
معمي يا ست الكل
والتوبة مش لاقياه
ولا هو بسعالها
يا ست يا طاهرة
يا بنت سيد الناس
احكي لسيدنا النبي
قصة غريب تايه
جايله علي بابه
وكفوف ايديه باردين
نفسه في نظرة عين
تمحيله توهانه
يا رب يا رحمن
يا خالق الأحزان
والهم والضيقة
اليوم يجر ف يوم
والموت يقرب يوم
وغريب علي الأعتاب
عاجز عن الإسهاب
في شرح أحزانه
2014
ليست هناك تعليقات:
إرسال تعليق